ازاى تقضي ٥ ايام فى الاقصر واسوان بفلوس قليله وبدون شركة سياحة مع نفسك ؟؟؟
ازاى تقضي ٥ ايام فى الاقصر واسوان بفلوس قليله وبدون شركة سياحة مع نفسك ؟؟؟
ازاى تنبسط فى الاقصر واسوان فى ٥ ايام بس
ومن غير مصاريف كتير
مبدئيا الرحلة دى بارت ٢ من سنتين عملت الجزء الاول منها بقا زى المسلسلات كدة المهم
اهم حاجه لو عاوز تسافر الاول تحجز فى مكان كويس نضيف رخيص + قريب من مزارات ومطاعم عشان ماتصرفش كتير فى المواصلات والتنقل
ومش شرط فندق درجة أولى او تانيه عادى المهم مكان نضيف
مبدئيا ابدأ الرحله يوم الوقفه عشان تحضر أجواء العيد فى كذا محافظة كدة وانت ماشي
يعنى هتشوف العيد فى أسيوط قنا سوهاج … فأنا فعليا شوفت العيد فى ٤ محافظات
وتنزل الاقصر بقا نام شويه عشان هتكون فرهدت
المهم بدأت اليوم روحت الممشي وروحت زورت بيوت ريفيه كدة استضافونى وشربت شاى بالنعناع جميل وركبت لانش فى النيل ودة طبعا عشان نعدى من البر الشرقي للعربي او العكس (ممكن تستبدله بالمعدية فى العيد الفرد ب ٥ ج )
وبعدها شوفت كافيه يكون ع النيل واسعاره حلوه
وكملت قعدتى لانى طبعا ماكانتش فيا باور لاكتر من كدة
تانى يوم روحت متحف الفن .. ومتحف التحنيط هما
قريبين شويه لبعض
وهما وبعدها برضه اتمشيت ع النيل وقعدت شويه وركبت الحنطور ( تسعيرتة فى رنج ٥٠ ج ) والتأكيد كذلك
وروحت
الفتره دى من السنه صعب تنزل الصبح كتير فالخروجات لازم تكون بعد العصر كدة
تالت يوم روحت معبد الاقصر وطريق الكباش والسوق السياحى
طبعا كنت روحتهم المره اللي فاتت بس ماقدرتش ماروحش الصراحة لان الصور فيهم تحفه ولبست كردان كدة فولكلور يمشي مع الاجواء
وبعدها روحت جزيرة الموز وهو مكان حلو للتصوير وسط الميه والخضره بس لازم تروحه قبل الغروب وبعدها جوله حلوه بلانش وتقعد فى اى كافيه او مطعم ع النيل
رابع يوم cut……. حرارتى عاليه وطوارئي ومستشفي وهكا
المهم نيجى لليوم الخامس بقا داى يوز فى اسوان
كالعادة باخد قطر الصبح بدرى اوصل اسوان بيكونو صحابي مستنيينى ونشد الرحيل
روحنا متحف النيل كنت نفسي اروح روحته بس من سنين كدة وروحنا مكتبة مصرالعامة قابلت صديقتي لان المكتبة مرتبطة بانشطتنا كفنانين تشكيليين اصلا
(قولت فرصه اعرفكم انى فنانة تشكيلية بقا)
وبعدها اتصورنا عند تمثال العقاد وقعدنا فى كافيه ع النيل
وبعدها لمحطة القطر وخدنا صور حلوه مع ان الناس كانت بتتفرج علينا يمكن عشان البورنيطة
وركبت بقا القطر ع الاقصر
وكملت تمشيه شويه وبعدها رجعت للقاهره
التجربة زى كل مره بقول انها مرهقه جداااا مش اى حد هيحبها او هيتحملها
بس هتنفعك لو فاصل نفسيا وعاوز تتفسح كتير بفلوس قليله
وكمان التخطيط دة عامتا ممتع
