إيه إللي باقي يا دنيا شعر / عماد عثمان
إيه إللي باقي يا دنيا
الشاعر / عماد عثمان
إيه إللي باقي يا دنيا لسه مــــا جبتهوش هاتي إللي عندك
العمر عدا والفرح فيكي مـــا شوفتهوش إيه يا دنيا قصدك
عايش حياتي حتي إللي مني ما بيسألوش
آسية قلوبهم ليه بيشوفوني يادوب رتوش
وكتافي شايلة سنين عذابي ولا كللوش إيه يا دنيا قصدك
إيه إللي باقي يا دنيا لسه مــــا جبتهوش هاتي إللي عندك
هاتي إللي عندك م العذاب ما تفكريش ولا تسأليني
هاتي الدمـوع ويا الجراح جنب الآلام ولا ترحميني
إوعي يوم تحني أبداً يوم عليه ولا مرة تصعب عليكي دموع عينيه
غربيني يا دنيا تاني غربيني سهريني ف الليالي وإتعبيني
العمر عدا والفرح فيكي مـــا شوفتهوش إيه يا دنيا قصدك
إيه إللي باقي يا دنيا لسه مــــا جبتهوش هاتي إللي عندك
…………………
السنين دارت عليه ولا شوفت فيها غير الجراح
والعمر فات ولا عادش فيه قد إللي راح
راحوا إللي كنت بحبهم
وبأرمي روحي ف حضنهم
وكنت حاسس بالأمان
وأنا لسه عايش جمبهم
العمر عدا والفرح فيكي مـــا شوفتهوش إيه يا دنيا قصدك
إيه إللي باقي يا دنيا لسه مــــا جبتهوش هاتي إللي عندك
